Кечээ "Манас" Эл аралык аэропортун 500дөн ашык кызматкер кайтарды

Кечээ, 7-октябрь күнү өлкөнүн башкы аба майданы "Манас" Эл аралык аэропортун кайтарууга "Кыргызаэронавигация" мамлекеттик ишканасынын, мамлекеттик Чек ара кызматынын жана ИИМдин аба транспортундагы ички иштер органдарынын 500дөн ашык кызматкери чыкты. Бул тууралуу "Манас" Эл аралык аэропортунун басма сөз кызматынан билдиришти.

Маалыматка ылайык, авиациянын кызматкерлери өлкөдө болуп жаткан акыркы окуяларга байланыштуу тартипти сактоого чыгышкан. Эң башкы милдет - аба транспортунун жана жүргүнчүлөрдүн коопсуздугун камсыз кылуу.

"Манас" Эл аралык аэропорту штаттык режимде иштеп жатат. "Манас" жана "Ош" аэропортторундагы бардык эл аралык жана ички каттамдар ырааттама боюнча аткарылууда.

Эске салсак, 5-октябрда шайлоонун жыйынтыгына нааразы болгон тараптар митингге чыгышкан. Мунун натыйжасында 6-октябрь түнү топтолгон эл Ак Үйдү басып алышып, өлкөдө баш аламандык жаралды.