"56 күндөн бери каттала элек болчу". Министр Бишкекте эпидемиологиялык абал татаалдашып кетиши мүмкүн экенин айтты

Бүгүн, 8-октябрда саламаттыкты сактоо министри Сабиржан Абдикаримов маалымат жыйын өткөрдү. Анда министр Бишкекте эпидемиологиялык абал курчуганын айтты.

Бишкек шаарында бир суткада 77 жаран илдетти жуктуруп алды. Мындай көрсөткүч шаар боюнча 13-августтан бери (56 күн мурун) аныктала элек болчу.

“Азыркы болуп жаткан көрүнүш негизги профилактикалык иш-чаралардын такыр сакталбаганы (маска кийүү, физикалык аралыкты сактоо, кучакташуу жана башка) таасирин бере баштады. Эки апталык көрсөткүчкө ылайык, инфекциянын жайылышы тездеп жатат.

Кечээ жана бүгүн илдетти жуктургандардын эң көп жаңы учурлары катталды, ушундай эле сан акыркы жолу 56 күн мурда катталган. Эгерде буга чейин түштүктө кырдаал курч болсо, азыркы тапта Бишкек шаарында да эпидемиологиялык кырдаал татаалдашып кетиши мүмкүн экендиги байкалууда", - деди министр.