Кылычбек Шакиров: "Центерра" Кыргызстандын "Кумтөрдөгү" үлүшүнүн 51 пайыз болушуна макул болбойт"

Канадалык "Центерра" компаниясы Кыргызстандын "Кумтөрдөгү" үлүшүнүн 51 пайыз болушуна макул болбойт. Муну бүгүн, 23-сентябрдагы коомдук угуу учурунда "Кыргызалтын" ишканасынын вице-президенти Кылычбек Шакиров айтты. "Биз сүйлөшүүлөрдү 68 пайыз менен баштаганбыз, андан кийин 52 пайыз талап кылдык. Математикалык эсеп менен алганда 46 пайыздан өйдө чыккан жок. Биз дароо түшүндүк, же эки тарап тең утат, же экөө тең утула турганын",- дейт Шакиров.   

Эске салсак, 1993-жылы "Кумтөр" келишими жаңы түзүлгөндө Кыргызстандын үлүшү 67 пайыз болчу. "Кумтөр" 10 жылдан кийин толугу менен Кыргызстан тарапка өтмөк, бирок андай болгон эмес. Келишим өзгөртүлүп, кыргыз тараптын үлүшү улам азайып отуруп 33 пайызга чейин түштү. Учурда айрым саясатчылар алгачкы келишимге кайтып, үлүштү 67 пайыз кылууну, айрымдар "Кумтөрдү" 100 пайызга мамлекетке алууну талап кылып жатат. Ал эми өкмөт пайданын 50х50 пайыздан бөлүнүшү туура деген позицияны карманууда.