Саламаттыкты сактоо министрлигинин жамаатына жаңы жетекчи Алымкадыр Бейшеналиев тааныштырылды

Вице-премьер-министр Аида Исмаилова Саламаттыкты сактоо министрлигинин жамаатына жаңы жетекчи – Алымкадыр Бейшеналиевди тааныштырды.

Вице-премьер-министр жаңы жетекчини тааныштырууда белгилегендей, ушундай кыйын кырдаалда күч-аракетибизди бириктирүү менен саламаттыкты сактоо тутумундагы маселелерди, биринчи кезекте COVID-19 илдетине каршы күрөшүү маселесин чечүүбүз зарыл.

«Күн сайын COVID-19 илдетин жугузуп алгандардын саны өсүүдө. Медициналык мекемелердин даярдыгы, мобилдик бригадаларды комплекттөө, зарыл дары-дармек каражаттары менен камсыздоо, кадрдык ресурсту даярдоо – биздин алдыбызда турган артыкчылыктуу милдеттер. Буга катар коронавирустан башка оорулардын алдын алуу жана дарылоо маселеси да көңүлдүн борборунда болушу абзел», - деп жыйынтыктады ал.