Бишкек ЖЭБине көмүр ташуу боюнча жооптуу кызматкерлердин коррупциялык схема түзүп алганы аныкталды

Бишкектеги Жылуулук электр борборуна көмүр ташуу боюнча жооптуу кызматкерлердин коррупциялык схема түзүп алганы аныкталды. Бул тууралуу Улуттук коопсуздук боюнча мамлекеттик комитеттин басма сөз кызматынан билдиришти.

Маалыматка ылайык, Бишкек ЖЭБине «Кыргызкөмүр» мамлекеттик ишканасы тарабынан көмүр жеткирүүдө ЖЭБдин жооптуу кызматкерлери мыйзамсыз акча чогултуунун коррупциялык схемасын түзгөн.

"Кызматкерлер көмүр казуучу компаниялар менен алдын ала макулдашып алып, лабораториялардан көмүрдүн сапатын жарактуу деген тастыктама берип турушкан. Бул кызматы үчүн аларга акчалай сыйлык да ыроолонуп келген. Бул аракет Жылуулук борбордун жабдууларынын эскиришине терс таасирин тийгизип, атмосферага булгоочу заттардын көбөйүшүнө алып келет.

Аталган факты боюнча Кылмыш-жаза кодексинин 237-беренеси "коммерциялык пара алуу" боюнча сотко чейинки өндүрүштүн материалдары катталды", - деп айтылат маалыматта.

Тергөө иштеринин алкагында, бул мыйзамсыз ишке тиешеси бар башка да адамдарды аныктоо аракети көрүлүп жатканы маалымдалат.