Алгачкы жолу коронавирус тоңдурулган азыктардын таңгагынан табылды

Кытайда биринчи жолу COVID-19 вирусу тоңдурулган деңиз азыктарынын таңгагынан табылды. Бул тууралуу Кытайдын оорулардын алдын алуу жана көзөмөлдөө борбору билдиргенин дүйнөлүк басылмалар жазышууда.

Анда айтылгандай, Циндао шаарында эксперттер эпидемиологиялык изилдөөнүн натыйжасында, сырттан келген тоңдурулган балыктын сырткы таңгагынан коронавирусту аныкташкан.

Маалыматка ылайык, вирус таңгакта узак убакыт жашай тургандыгы далилденген. Белгилүү шарттарда азыкта эч кандай санитардык нормалар сакталбаса, вирус бат жугат.

"Азыркы убакта изилдөө көрсөткөндөй, COVID-19 вирусу тамак-аш аркылуу берилбейт. Бүгүнкү күнгө чейин тоңдурулган азыктардын таңгагынан вирус жуккан учурлар катталган эмес", - деп жазылат маалыматта.

Ошондой эле аталган вирустун эң негизи жугуу жолу катары аба жана жакын байланыш болуп кала берери айтылган.