Финпол: "Мурдагы өкмөт башчы Мухаммедкалый Абылгазиев менен депутат Кубанычбек Жумалиевге өлкө аймагынан чыгууга тыюу салынды"

Мурдагы өкмөт башчы Мухаммедкалый Абылгазиев менен депутат Кубанычбек Жумалиевге өлкөдөн чыгууга тыюу салынды. Бул тууралуу маалыматты SUPER.KG порталына Финполдун басма сөз кызматы тастыктады.

Финполдун маалымат катчысы Анастасия Пискур билдиргендей, Мухаммедкалый Абылгазиев менен депутат Кубанычбек Жумалиев расмий түрдө өлкөдөн чыкпоо тууралуу эскертүү алышты. Бул боюнча толук маалымат кийинчерээк берилери белгиленди.

Абылгазиев 4G режиминдеги мобилдик байланыш үчүн радио жыштыкты каттоо чырынан кийин 2020-жылдын июнь айында кызматтан кеткен.

Ал эми депутат Кубанычбек Жумалиев учурда Финполду жетектеп турган Сыймык Жапыкеевдин үстүнөн арыз жазып, сот Жумалиевдин пайдасына 10 миң сом төлөөгө милдеттендирген. Өз кезегинде Сыймык Жапыкеев депутатты мыйзамсыз байыган деп сындап келген.

Бул боюнча Кубанычбек Жумалиевдин жактоочусу Бактыбек Жумашевге байланышканыбызда, "азырынча бул боюнча маалыматым жок" деп жооп берди.