Мамлекеттик бажы кызматы баасы 700 миң сомго чукул мыйзамсыз ташылып келген товарды кармашты

Мамлекеттик бажы кызматынын кызматкерлери баасы 700 миң сомго чукул мыйзамсыз ташылып келген товарды кармашты. Бул тууралуу Мамлекеттик бажы кызматынан билдиришти.

ЕАЭБдин бажы аймагына товарларды жана транспорт каражаттарын мыйзамсыз ташып кирүү фактыларын табуу жана аларга бөгөт коюу боюнча жүргүзүлгөн ыкчам иш-чаранын жыйынтыгында Баткен бажысынын кызматкерлери тарабынан Баткен шаарында Э.И. аттуу жарандын башкаруусундагы Вольво үлгүсүндөгү транспорт каражаты токтотулуп текшерилген.

Жогоруда көрсөтүлгөн транспорт каражатынын жүк бөлүгүн текшерген учурда Кыргыз Республикасына чектеш мамлекеттен мыйзамсыз ташылып келе жаткан жалпы салмагы 11647 килограмм болгон жүзүм жана курма табылган. Кармалган товардын жалпы наркы 697 миң 270 сомду түзгөн. Бул факты Кылмыштардын жана жоруктардын бирдиктүү реестрине катталып, материалдар тергөөгө караштуулугу боюнча өткөрүлүп берилген.