Чолпон-Ата шаарында көк бөрү боюнча президенттин кубогу өтөт

2020-жылдын 3-ноябрынан 8-ноябрына чейин Чолпон-Ата шаарынын ат майданында (Ысык-Көл облусу) өлкөнүн Эгемендүүлүк күнүнө арналган көк бөрү боюнча Кыргыз Республикасынын президентинин кубогу өтөт.

Сыйлыктар Жогорку жана I лиганын команадаларынын арасында ойнотулат. Жылда өтүп жүргөн көк бөрү боюнча Кыргыз Республикасынын президентинин Кубогунун алкагында ат чабыш, эр эңиш, салбуурун боюнча мелдештер өтөт.

Иш-чара республиканын аймактарында улуттук оюндарды өнүктүрүү жана жайылтуу максатында өткөрүлүп жатат. Спорттук иш-чара Жаштар иштери, дене тарбия жана спорт боюнча мамлекеттик агенттиктин алдындагы Спорттун улуттук түрлөрү боюнча дирекциясы тарабынан Көк бөрү, Эр эңиш, Салбуурун жана Аргымак федерациялары менен биргеликте өткөрүлүп жатат.

Мелдештердин программасы:

3-7-ноябрь – көк бөрү боюнча алдын-ала беттешүүлөр;

7-ноябрь – көк бөрү боюнча 3-орун үчүн мелдеш, эр эңиш, салбуурун боюнча мелдештер;

8-ноябрь – көк бөрү боюнча финалдык мелдештер, эр эңиш, салбуурун, ат чабыш боюнча мелдештер.