Бренддик кийимдер. Садыр Жапаровдун кемселинен тартып Камчы Көлбаевдин күрмөсүнө чейин талкууланууда

Президенттин милдетин аткаруучу жана өкмөт башчы Садыр Жапаров өлкөдөгү жана дүйнөлүк коомчулуктагы эң көп талкууга алынган саясий фигурага айланды. Буга чейин социалдык тармактын колдонуучулары арасында анын мамлекет башкаруудагы кабыл алган чечимдери менен иш-аракеттери көңүл чордонунда болуп келсе, бүгүн, 23-октябрда Садыр Жапаровдун кемсели талкууга алынды. Садыр Жапаров социалдык тармактагы баракчасына шайлоо тууралуу билдирүү калтырып, ага кошо сүрөтүн жүктөгөн.

Бул билдирүү чыгары менен интернет колдонуучулар сүрөттөгү Садыр Жапаров кийип турган жеңи жок күрмө белгилүү KITON фирмасына таандык, баасы болжол менен 246 миң 250 сом турган бренддик кийим экенин айтып чыгышты. Айрымдары баасы өтө кымбат кийим кийген президенттин милдетин аткаруучуга сын айтса, кээ бири тескерисинче аны колдоо иретиндеги билдирүүлөрдү калтырышкан. Бирок чындыгында эле Садыр Жапаров кийип турган күрмө жогоруда көрсөтүлгөн фирмага таандыкпы же жокпу белгисиз.

Ал эми 22-октябрда кримтөбөл Камчы Көлбаев кармалып, аны кармоо учурунда кийип жүргөн сырткы кийими дагы колдонуучулардын талкуусунан тышкары калган жок. Көлбаевдин FANDY брендиндеги жынсы күрмөсүнүн интернет сайттагы баасы 995 евро (95 миң 150 сом) турары көрсөтүлгөн.

УКМКнын кызматкерлери Раимбек Матраимовду кармап кетип баратканда, анын кийген кепкасынын баасын интернеттен карап көрүүгө жетишкен колдонуучулар 36 миң рубль (38 миң 266 сом) турарын эсептеп чыгышкан.