Айсулуу Тыныбекова улуттук кийим кийип, узун өрүлгөн чачы менен түшкөн сүрөтүн жарыялады

Эркин күрөш боюнча дүйнө чемпиону Айсулуу Тыныбекова улуттук кийим кийип, узун өрүлгөн чачы менен түшкөн сүрөтүн социалдык тармактагы баракчасына жарыялады.

"Биз көптөн бери улуттук стилде фотосессия уюштурууну каалап, акыры пландарыбызды ишке ашырдык. Бул менен биз эки доорду айкалыштыра алдык. Кызыл кең көйнөк менен чагылдырылган заманбаптыкты жана салттуу тебетей, чыптама, зер буюмдар аркылуу элибиздин кылымдык тарыхын айкалыштырдык", - деп жазылат анын билдирүүсүндө.

Айсулуу Тыныбекова эркин күрөш боюнча Азиянын үч жолку чемпиону (2016, 2017 жана 2019), 2018-жылы Индонезиянын борбору Жакарта шаарында өткөн XVIII жайкы Азия оюндарынын алтын байгесинин ээси жана 2019-жылы Казакстандын борбору Нур-Султан шаарында өткөн Дүйнө чемпиондугунун жеңүүчүсү.