Араванда милиция кызматкерине кол көтөргөн жаран кармалды

Араванда милиция кызматкерине кол көтөргөн жаран кармалды. Бул тууралуу Ош ОИИБинин басма сөз кызматынан билдиришти.

Маалыматка ылайык, Араван районунда милиция формасын кийип турган кызматкерди белгисиз жаран колу менен бет маңдайына уруп жибергендиги боюнча видеотасма социалдык тармакка тарап кеткен.

"Аталган маалымат Араван РИИБинин маалыматтардын электрондук журналына катталып, алгачкы текшерүү жүргүзүү учурунда милиция формасын кийип турган кызматкер ИИМдин Күзөт кызматынын Араван районунун Күзөт бөлүмчөсүнүн милиционери милициянын кенже сержанты 24 жаштагы А.К. экендиги такталган.

Окуя 23-октябрь күнү саат 17:20 чамасында К.А. кызматтан кийин табелдик ок атуучу куралын тапшырып, Араван районунун С.Юсупова айыл аймагынын Айдаров көчөсүндөгү үйүн көздөй бараткан учурда ошол жерде турган 37 жаштагы Э.Д. оозго алгыс сөздөр менен тилдеп, эч себепсиз колу менен бетине жана моюнуна уруп жиберген. А.К.нын денесинен кандай деңгээлде жаракат алгандыгын аныктоо үчүн соттук-медициналык экспертиза дайындалган. Шектүү Э.Д. эч жерде иштебейт, өз сөзүндө мурда эки жолу ээнбаштык беренелери менен соттолгон. Кылмышка шектүү 48 саатка убактылуу кармоочу жайга киргизилди", - деп жазылат маалыматта.