Белгилүү футболчу Роналдиньо коронавирус жуктуруп алды

Италиянын "Милан" футболдук клубунун бразилиялык мурдагы чабуулчусу Роналдиньо коронавирус инфекциясын жуктуруп алды. Бул тууралуу футболчу өзү билдиргенин чет элдик басылмалар жазып чыгышты.

"Мен Белу-Оризонти шаарына ишемби күнү Auto Truck иш-чарасына катышуу үчүн келгем. Уюштуруучулардын суранычы менен тесттен өттүм. Менден инфекция аныкталды. Оору симптомсуз өтүп жатат жана абалым жакшы. Бирок мен иш-чараны таштап кеткенге аргасызмын. Баарыңыздарды кучактайм​", - деп билдирген Роналдиньо.

Роналдиньо март айында бир тууган агасы менен бирге жасалма паспорт колдонгон деген шек менен Парагвайдан кармалган. Кийинчерээк алар 1 миллион 600 миң евро күрөө менен бошотулган. 25-августта Парагвай соту Роналдиньону бошотуу жана ага коюлган бардык айыптарды алып салуу чечимин чыгарганы белгилүү болду.