Акын Темирлан Ормуков БШКнын Текебаевдин мандатын кайтарып берүү чечимин жокко чыгаруу үчүн сотко кайрылды

Акын Темирлан Ормуков БШКнын Өмүрбек Текебаевдин мандатын кайтарып берүү чечимин жокко чыгаруу үчүн сотко кайрылды. Бул тууралуу ал социалдык тармактагы баракчасына жазып чыкты.

"Мен 16-октябрда БШКдан Текебаевдин мандат алуусу боюнча чечимдин түп нускасын алып, көчүрмөсүн сотко тапшыргам. Сот отуруму 2-ноябрга дайындалган. Мага Аслан деген бирөө жолугуп, БШКнын түп нуска чечимин бериңиз, сизге башка нускасын берели деп сунуштаган. "Эмнеге алмаштыргыңар келип жатат?" десем, ал чечимдин "туура эмес жактары болуп калыптыр" деп жалдыраган. Мен макул болбой койсом алгач 500 доллар анан миң долларга чейин сунуштап, такыр көнбөй койсом аябай сөгүп, башкача сүйлөшөбүз деп кетип калган. Мен башкача сүйлөшөбүз дегенин коркутуу катары баалап, жаныма жан сакчы алып жүрсөм, булардын башкача сүйлөшкөнү ушул турбайбы. БШКдан Текебаев боюнча протокол, акт, чечимдерди толук өзгөртүп, анан мен сотко тапшырган чечимди биздики эмес деп же жасалма деп танышат көрүнөт", - деп жазды ал.