Садыр Жапаров: "Дүйшөбаев шоу болсо да уюштуруп, мамлекетке миллиарддарды кустуруп көрүптүрбү?"

Кечээ, 27-октябрда Коопсуздук кеңешинин катчысы Кеңешбек Дүйшөбаев кызматынан кеткени кабарланган.
Ал кызматтан алынары менен маалымат жыйын уюштуруп, айрым фактылар боюнча кенен маалымат берген. Анда Дүйшөбаев Бажы кызматынын мурдагы орун басары Раим Матраимовдун, крим чөйрөдө аты айтылып жүргөн Камчы Көлбаевдин кармалышын спектакль деп атаган. Бул айтылгандарга президенттин милдетин аткаруучу, премьер-министр Садыр Жапаров жооп берди.

Айтымында, Дүйшөбаев көп жыл күч органдарында олтуруп, мамлекет үчүн кенедей да пайдалуу иш жасаган эмес жана анын Матраимов жана Көлбаев окуясын спектакль атаганы негизсиз.

"Дүйшөбаев 30 жылдан бери күч органдарында иштеп келе жатат, анын генерал наамы бар. Ал сержанттан бери өсүп келген адам, 30-40 жылдан бери күч органдарында жүрөт. Ал ушул убакыт аралыгында бирөөнү камап, мамлекетке бир тыйын пайда келтириптирби? Ал шоу болсо да уюштуруп, миллиарддарды, миллиондорду төктүрүп, кустуруп көрүптүрбү? Муну менен эле бүтпөйт, коррупционерлерди кустуруу дагы уланат.

Азырынча социалдык тармактарда колдонуучулар сын-пикир айтпай, суроолорду берип турса жакшы болот эле. Албетте, жасап жаткан ишке сынчы көп болот экен. Бирок ал жасалып жаткан иштер жеке менин же жакындарымдын кызыкчылыгы эмес, бул жалпы мамлекеттин, элдин кызыкчылыгы үчүн жасалып жаткан иштер. Мындан ары да бул иштер жасалат, убакыт көрсөтөт, биздин туура жолдо бара жатканыбызды убакыт далилдейт.

Мен түшүнүп жатам, Раимди камаш керек эле деген кептер айтылып жатат. Бирок аны кармап турганда эмне пайда? Биз мамлекеттин эсебинен аларды багабыз, үч маал тамак беребиз, башкасын кылабыз, бир жылдап, эки жылдап жата берет. Андан көрө ал миллиарддарды төгүп жатпайбы? Азыр бул башталышы гана, учурда тергөө иштери жүрүп жатат. Бизде түрмөнү толтуруп, атак-даңк алуу башкы максат эмес, бюджетти толтуруу башкы максат болуп турат", - деген Жапаров.

Эскерте кетүүчү жагдай, 21-октябрда Садыр Жапаров элге кайрылуу жасаган. Анда ал өлкөдөгү коррупционерлерге кайрылып, аларга мамлекеттен уурдаган акчасын кайра кайтарууга 30 күн убакыт бергенин айткан. Ошол эле учурда экономикалык амнистияны пайдаланбагандарга мыйзам чегинде катуу чаралар көрүлөрүн баса белгилеген.