"Өтө кооптуу". Дүйнөдө акыркы бир жума ичинде коронавирустун жайылышынын рекорддук көрсөткүчү катталды

Дүйнө жүзүндө акыркы бир аптанын ичинде коронавирус инфекциясынын жайылышынын рекорддук көрсөткүчү катталды. Бул тууралуу Дүйнөлүк саламаттыкты сактоо (ДССУ) уюмуна таянып, чет элдик басылмалар жазып чыгышты.

Маалыматка ылайык, 19-октябрдан 25-октябрга чейин дүйнөдө 2 миллион 884 миң 604 адам вирус жуктурган. Ошол эле учурда 39 миң 712 адам COVID-19 илдетинен каза болгон. Бул көрсөткүч өткөн жумага (12-18-октябрь) салыштырмалуу оору жуктурган учур - 16 пайызга, өлүмдүн көрсөткүчү - 8 пайызга жогорулаган.

ДССУнун маалыматы боюнча жума ичинде инфекция эң көп Европада катталган (1 миллион 335 миң 914).

Дүйнөлүк саламаттыкты сактоо уюму 11-мартта коронавирус инфекциясын пандемия деп жарыялаган. Бүгүн, 28-октябрга карата дүйнөдө коронавирус жуктургандардын жалпы саны 43 миллион 903 миң 43кө жетти. Анын ичинен 29 миллион 730 миң 695 бейтап айыгып чыкты. Тилекке каршы, 1 миллион 166 миң 127 адам каза болду.