Кызмат талаш ЖОЖдорго жетти. Кыргыз улуттук университетинин жамааты Садыр Жапаровго кайрылуу жолдошту (видео)

Жусуп Баласагын атындагы Кыргыз улуттук университетинин жамааты окуу жайдын учурдагы ректору Канат Сыдыковдун ордуна профессор Каныбек Осмоналиевдин келишине каршы. Бул тууралуу улуттук университетинин расмий сайтына маалымат жарыяланды.

Маалыматка ылайык, окуу жайдын кызматкерлери президенттин милдетин аткаруучу жана өкмөт башчы Садыр Жапаровго төмөндөгүдөй кайрылуу жөнөтүшкөн.

"Урматтуу Садыр Нуркожоевич! Бизге Жусуп Баласагын атындагы Кыргыз улуттук университетинин ректору Садыков Канат Жалиловичти ээлеген кызмат ордунан бошотуп, анын ордуна профессор Осмоналиев Каныбек Осмоналиевичти дайындоо аракеттери жүрүп жатат деген кабар келип жетти. Жусуп Баласагын атындагы Кыргыз улуттук университетинин жамааты мындай алмаштырууга каршы экендигин билдирет.

Ректор кызматына шайлоо жолу менен дайындоо болорун жана Канат Садыков 2017-жылдын май айында көпчүлүк добуш менен университеттин жамааты тарабынан 5 жылдык мөөнөткө шайланганын белгилеп кетебиз.

Азыркы учурда ректор Канат Садыковду жумуштан бошонуу арызын жазууга мажбурлап жатышат.

Өз кайрылууларыңызда сиз бардык деңгээлдеги жетекчилерди алмаштыруу жамааттын ой-пикиринин негизинде жүргүзүлөт деп белгилегенсиз.

Каныбек Осмоналиевге карата белгилеп кетчү нерсе, 2017-жылдын январь айында ал физика жана электроника факультетинин деканы кызматына жарыяланган шайлоого катышып, жамааттын колдоосуна ээ болгон эмес. Бул факты жамааттын Каныбек Осмоналиевге болгон ишенбөөчүлүктү көрсөтүп турат.

Биздин кайрылуубуздун негизинде, Жусуп Баласагын атындагы Кыргыз улуттук университетинин ректорун алмаштыруу аракеттерин токтотууңузду суранабыз.

Мындай аракеттер университеттин жалпы жамаатынын жана студенттеринин каршылыгын туудурат", - деп жазылат кайрылууда.