ЖЭБдин директору ишканадагы авария боюнча түшүндүрмө берди

Бүгүн, 29-октябрда Бишкек ЖЭБинде жарылуу болуп, шаар тургундарына жылуулук, ысык суу берүү үзгүлтүккө учурады. Буга байланыштуу Жылуулук электр борборунун директору Андрей Воропаев түшүндүрмө берди.

"Бүгүн 13:06да жылуулук электр борборунда өчүрүү болду. Ал учурда 110 киловольттук линиянын чыңалуусу жоголуп кеткен. Мындан улам станцияга күч келген жана жылуулук берүү токтогон. Азыркы тапта станциянын иши 75 пайыз калыбына келтирилди, дагы да болсо калыбына келтирүү иши уланууда. Шаардыктар кабатырланбай эле койсо болот, азыр баары жакшы", - деди Воропаев.

Белгилей кетсек, 2018-жылдын 26-январында Бишкек ЖЭБинде өндүрүштүк кырсык болуп, шаардагы үйлөргө берилген жылуулук 7 күнгө төмөндөгөн. Андан кийин ЖЭБди жаңылоого Кытайдан алынган 386 миллион доллар насыя туура эмес пайдаланганы ачыкка чыгып, 4 кылмыш иши козголгон.

Анын негизинде энергетика тармагындагы ишканалардын жетекчилеринен тышкары мурдагы өкмөт башчылар Жантөрө Сатыбалдиев, Сапар Исаков, депутат Осмонбек Артыкбаев жана башкалар кармалган.