Билим берүү жана илим министрлиги катасы жок китептерди басуу боюнча иш-чараларды баштады

Китептердин сапаты, анын экспертизалоо, катасы жок китептерди басуу боюнча иш-чаралар башталды. Бул тууралуу бүгүн, 29-октябрда билим берүү жана илим министри Алмазбек Бейшеналиев түз эфирде билдирди.

"Билим берүү тармагында реформа жасоо иштери башталды. Буга түзүмдүк өзгөрүүлөр, билим берүү жана мазмуну боюнча өзгөрүүлөт кирет. Мазмун боюнча өзгөрүү бул китеп маселесине байланыштуу. 10 күн мурун окуу китеп, мекеменин курулушу боюнча буйрукка кол койдум. Китептердин сапаты, аны экспертизалоо, катасы жок китептерди басуу боюнча иш-чараларды баштайбыз деп турабыз. Китеп үчүн бир жылда 120 миллион сом бөлүнөт. Бирок бизге керектүү болгон сумма бир жылга 600 миллион сомду түзөт.

Китептердин сапаты боюнча башкача мамиле менен иштейли деп жатабыз. Ага карата чыгармачылык топ куралды. Бул топко жаш, мыкты адистер кирди. Министрликтин астында окуу китеби деген жаңы мекеме ачылып жатат. Ал жөнүндөгү буйрукка кол койдум. Алар китептин маанисин, мазмунун, эл аралык стандарттарга жооп берүүсүн, өлкөнүн эмгек рыногуна жооп берген бардык жактан айкалышкан китептер чыгып баштайт деп мен силерди ынандыргым келет. Бул ишти ыкчам колго алып баштадык. Китептердеги материалдар жаш өзгөчөлүктөргө туура келбейт деген маселе турат. Китептердин мазмунун, жаш курактык психология жооп бериши тууралуу дагы маселе бар. Бул боюнча иш-чаралар башталды", - деди министр.