"Алар бизге укмуштуудай жардам бермек". Лукашенко Кыргыз өлкөсүндөгүдөй элдик кошуунду түзүүнү сунуштады (видео)

Беларусь президенти Александр Лукашенко Кыргыз өлкөсүндөгүдөй кылып элдик кошуун түзүүнү сунуштады. Бул тууралуу аталган өлкөнүн басылмалары жазып чыгышты.

Маалыматка ылайык, мамлекет башчы Лукашенко шаар ичинде милиция кызматкерлерине тартипти сактоого көмөктөшкөн ыктыярдуу элдик кошуундарды түзүү тууралуу ИИМдеги жаңы кадрдык дайындоолор маалында билдирди.

"Бизде элдик кошуундар жапа тырмак ишке кирише элек. Силер Кыргыз өлкөсүндө эмне болгонун көрдүңөрбү? Баш аламандыкта күч түзүмдөрүнүн кызматкерлери качып кеткенде, өлкөнү коргоо жоопкерчилигин ким алды? Элдик кошуундар. Алар качып кеткен милиция, аскер кызматкерлери, атайын кызматтагыларды кошуп алып күчтүү элдик кошуунду түзүштү. Анан бир сутканын ичинде эле өрткө суу сээп коюшту", - деди Лукашенко.

Ошондой эле өлкө башчысы мобилдик отрядга мурдагы аскер кызматкерлерин тартууну билдирди.

"Ошон үчүн элдик кошуундар иштеши керек. Акыры алар өлкөнү эмес, өз үйлөрүн коргоосу керек. Ал эми өлкөнү болсо биз силер менен - генералдар жана башка адамдар, ички аскерлер, армия болуп өлкөнүн корголушун камсыз кылабыз", - деп кошумчалады президент.