“Сагын көз жумду”. Коомчулук бир мигранттын мисалында Кыргыз өлкөсүндө жумуш орундарын түзүү керектигин айтып чыгышты

Социалдык тармактын Олег Козловский аттуу колдонуучусу өзүнүн баракчасына кире бериштеги жазуунун сүрөтүн бөлүштү. Аталган жазуу интернет желесине тарап, кызуу талкууга алынууда.

Олег Козловский "Фейсбуктагы" баракчасына сүрөттү тиркеп, "экинчи толкун мезгилиндеги үйгө кире бериш жердеги кулактандыруулар" деп түшүндүрмө берген.

Аталган сүрөттө: "Эл журт, таштандыларды ыргытпагыла! Сагын каза болду. Азырынча тазалай турган эч ким жок", - деп жазылган.

Ошондой эле аталган үйдүн алдына каза болгон Кыргыз жараны Сагын Жунусов коронавирус илдетинен улам көз жумгандыгы тууралуу дагы сүрөт илинген.

"Урматтуу жашоочулар, 27-октябрда биздин эшиктин алдын тазалаган Сагын Жунусов арабыздан кеткенин өкүнүү менен айтабыз. Коронавирус инфекциясы анын организмине оор кесепетин тийгизди. Ал эки жума жандандыруу бөлүмүндө жатып, ооруканада көз жумду.

Биз Сагынды боорукер, сезимтал, мыкты жумушчу жана жакшы үй-бүлөлүү адам катары эстеп калабыз.

Сагындын жакындарына материалдык колдоо диспетчерлик кызмат аркылуу кабыл алынат", - деп жазылган.