Төмөнкү Ала-Арчадагы 26 жаштагы кыздын өлүмү: Шектүүлөрдүн бири күрөөгө акча коюу менен үйүнө чыкты

Чүйдүн Төмөнкү Ала-Арча айылында 26 жаштагы кызды өлтүрүп, анын атасын бычактап кеткен окуяга шектелип кармалгандардын бири 1 миллион сом күрөө коюп үйүнө чыгарылды. Бул тууралуу Чүй облустук сотунун басма сөз кызматынан кабарлашты.

"Шектүү ден соолугуна байланыштуу убактылуу кармоочу жайдан Улуттук кардиология жана терапия борборунун бөлүмүнө которулган. Ал жашы жете элек 3 баласы бар деген аныктамасы, ошондой эле жабырлануучу тараптын тосмо арызынын негизинде сот департаментине 1 миллион сом күрөө коюп үйүнө чыгарылган", - деп билдиришти мекемеден.

Ал эми калган эки шектүү убактылуу кармоочу жайда, тергөө иштери улантылып жатканын кошумчалашты.

Окуянын чоо-жайы:

26-сентябрь күнү болжол менен саат 02:50 чамасында үйгө бет капчан белгисиз эки киши кирген. Алар 62 жаштагы Т.Ж. аттуу киши менен анын 26 жаштагы Т.А. аттуу кызын бычактап, андан соң качып кетишкен. Натыйжада алган жаракаттарынын негизинде 26 жаштагы кыз көз жумуп, ал эми эркек киши Бишкектеги ооруканалардын бирине жеткирилген. Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган.

ИИМдин, Чүй ОИИББинин жана Аламүдүн РИИБинин кызматкерлери тарабынан кылдаттык менен жүргүзүлгөн иш-чаралардын натыйжасында кылмышка шектүүлөр кармалган.