Бир аптанын ичинде "Семетей" госпиталы бейтаптарды кабыл ала баштайт

Бир аптанын ичинде "Семетей" госпиталы (мурдагы «Ганси» авиабазасы) COVID-19 жана пневмония менен ооругандарды кабыл алууга толук даяр болот. Бул тууралуу Өзгөчө кырдаалдар министрлигинин басма сөз кызматынан кабарлашты.

Маалыматка ылайык, бүгүн, 2-ноябрь күнү «Семетей» госпиталында өзгөчө кырдаалдар министри Бообек Ажикеев менен саламаттыкты сактоо министри Алымкадыр Бейшеналиев жолугушуу өткөргөн.

Анда мекеме өкүлдөрү "Семетей" госпиталынын COVID-19 менен ооругандарды кабыл алууга даярдыгы тууралуу талкуулашкан.

"Текшерүүнүн жүрүшүндө лабораториядан тышкары госпитал толугу менен даяр экендиги маалым болду. Жандандыруу бөлүмүндө 35 орундук, ал эми дарылоо бөлүмүндө 250 орундук бар, муктаждык жаралса, орундуктардын саны көбөйөт. Мындан тышкары, Өзгөчө кырдаалдар министрлиги тараптан бейтаптарга жана медициналык кызматкерлерге тамак-аш менен камсыздалынышы айтылды", - деп айтылат маалыматта.

4-ноябрдан баштап керектүү оргтехникалар, медициналык жабдууларды орнотуу иштери башталат.