"Улуттук энергетикалык холдинг" компаниясына жаңы жетекчи келди

"Улуттук энергетикалык холдинг" компаниясынын төрагасы болуп Нурбек Козубеков дайындалды. Аны бүгүн эмгек жамаатына Мамлекеттик мүлктү башкаруу фондунун статс-катчысы Илияз Ташбаев тааныштырды.

"Илияз Ташбаев Улуттук энергохолдингдин жамаатын компаниянын жалгыз акционеринин – Мамлекеттик мүлктү башкаруу боюнча фондунун чечими менен тааныштырып, Нурбек Козубеков ар түрдүү коммерциялык жана эл аралык уюмдар менен биргеликте иштешүү боюнча көп жылдык тажрыйбага ээ экендигин белгиледи", - деп жазылат маалыматта.

"Улуттук энергетикалык холдингдин" буга чейинки төрагасы Айтмамат Назаров башка кызматка которулуп жатканына байланыштуу кызматтан бошотуусун суранып, арыз жазганы кабарланган.

Айтмамат Назаров "Улуттук энергетикалык холдинг" компаниясына жетекчи болуп былтыр 23-майда дайындалган. Ага чейин ал Жогорку Кеңештин депутаты болгон.