Садыр Жапаров жаңыланууну кабыл алгысы келбегендер конституциялык реформа жүргүзүүгө каршы чыгып жатышканын айтты

Президенттин милдетин аткаруучу, премьер-министр Садыр Жапаров Жалал-Абад облусуна жасаган иш сапарынын алкагында облустун активи менен жолугушту. Бул тууралуу өкмөттүн басма сөз кызматынан билдирди.

Жолугушуунун жүрүшүндө президенттин милдетин аткаруучу сот жана укук коргоо системин реформалоо керектигин белгиледи. Ошондой эле жаңыланууну кабыл алгысы келбегендер конституциялык реформа жүргүзүүгө каршы чыгып жатышканын кошумчалады.

"Конституциялык реформаларга тоскоолдук кылып, өздөрү каалагандай өткөрүп алалы деген күчтөр бар. Ошондуктан чагымчылдыкка алдырбого чакырам. Элдин дагы бир чоң талабы - бул адилеттүүлүк, айрыкча сот акыйкатсыздыгы жарандарыбызды кыйнап бүттү. Өтө бийик квалификациялык талаптар коюлуучу сот системинде: сабатсыз,күн карама адамдар иштеп жатат. Анын кесепети карапайым калкка оор тийип жатат. Ал эми укук коргоо органдары – буйрутма аткаргыч органга айланды. Ошондуктан сот жана укук коргоо органдарын реформалоого жетишебиз", - деди Садыр Жапаров.

Ошондой эле коррупцияга каршы реалдуу стратегиялык кадамдар жасаларын кошумчалады.

"Коррупцияны эл жасабайт. Аны эл кызматындагы адамдар жасайт. Ошондуктан мыйзамдуулук жана туруктуулук керек. Мыйзамдуулук орносо миллиарддаган инвестициялар келет,
миңдеген жумуш орундары пайда болот, элдин кирешеси көбөйөт, контрабанда токтойт, акыйкаттык орнойт. Ошондой эле мамлекетибиз өнүгөт", - деди Жапаров.

Аларды чечүү боюнча тармактык мамлекеттик органдарга жана жергиликтүү өз алдынча башкаруу органдарына бир катар тапшырмалар берилди.