"Атамбаев колониядан кол булгалады". Алмазбек Атамбаевдин абакта жатканына 1 жыл 3 ай болгону айтылды

Бүгүн, 5-ноябрда №47 колониянын алдына мурдагы өлкө башчы Алмазбек Атамбаевдин тарапташтары чогулду. Бул тууралуу Рита Борбукеева социалдык тармактагы баракчасы аркылуу түз эфир маалында билдирди.

Анда чогулгандар менен бирге Атамбаевдин жубайы Раиса Атамбаеванын дагы келгенин көрүүгө болот.

"Алмазбек Шаршеновичтин кан басымы төмөн, СИЗО-1де жатканда суук тийип калыптыр. Бронхит болуп ооруп, дарыланып жатат. Бул жакка келгенине 10 күн болду. Андан бери бир жолу жолуктук, кызы Алия дагы жолукту. Азыркы бийликтен жана Жогорку Соттон ачык, адилеттүү соттордун өтүшүн камсыздоону суранам. Алмазбек Атамбаев УКМКнын СИЗОсунда 1 жыл 3 ай отурду. Ал өзү дагы күндөрдү эсептеди, ошондо 550 күн цементте жана бетондо отурду" , - деген Раиса Атамбаева.

№47 колониянын алдына чогулган мурдагы өлкө башчынын тарапташтарына жолугушууга ураксат берилбеген соң, колониянын терезелери көрүнгөн жакка барып Атамбаевдин атын айтып кыйкырып турушту. Бир маалда алыстан Атамбаев көрүнүп, кол булгалап кеткенин тарапташтары билдирди.