Башкы прокуратура: "Мамлекетке 1 миллиард сомдон ашык келтирилген зыян боюнча факты аныкталды"

Мамлекетке 1 миллиард сомдон ашык келтирилген зыян боюнча факты катталды. Бул тууралуу башкы прокуратурадан билдиришти.

Маалыматка ылайык, өкмөттүн 2006-жылдын 24-апрелиндеги токтому менен Жалал-Абад облусунун Чаткал районунун аймагында жалпы аянты 25 миң 270 гектарды түзгөн "Сандалаш" коругу уюштурулган. 2012-жылдын август айында өкмөттүн токтому менен алтын кенин иштетүү үчүн компаниялардын бирине ижарага берилген 3661 гектар жер тилкесинин бир бөлүгү (1124,7 гектар) жогорудагы коруктун аймагында жайгашкандыгы жана өзгөчө корголуучу жаратылыш жерлеринин категориясына кирери аныкталган. Бирок мамлекеттик органдардын кызмат адамдары, мыйзамда белгиленген тартипти бузуу менен, өзгөчө корголуучу жаратылыш аймагынын жерлерин башка жердин категориясына которбостон, ошондой эле токой жана айыл чарба өндүрүштөрүнүн жоготууларынын ордун толтурбастан, аталган жер тилкелерин тоо-кен компаниясына убактылуу пайдаланууга мыйзамсыз беришип, натыйжада мамлекетке 1 миллиард сомдон ашык зыян келтирилген.

Аталган факты 3-ноябрда Башкы прокуратура тарабынан Жазык кодексинин 319-беренесинин 1-бөлүгү (коррупция) менен Кылмыштардын жана жоруктардын бирдиктүү реестрине катталып, сотко чейинки өндүрүш башталды. Ошондой эле мыйзам бузууларды четтетүү жөнүндө өкмөткө сунуш киргизилди.