Армениядагы митингчилер парламенттин имаратын басып алышты. Бишкектеги 5-октябрдагы Ак Үйдүн абалы менен салыштырабыз (сүрөттөр)

Премьер-министр Никол Пашиняндын Тоолуу Карабахтагы куралдуу тирешти токтотуу боюнча келишимге кол койгонуна нааразы болгон митингчилер парламентти басып алышты. Бул тууралуу чет элдик басылмалар жазып чыгышты.

Маалыматка ылайык, документке кол коюлары менен өкмөт үйүнүн алдында нааразычылык акциялары башталган. Митингчилер имаратка кирип барып, Пашиняндын иш бөлмөсүн талкалап, андагы мамлекеттик символдорду алып кетишкен.

Учурда нааразы болгондор башка депутаттардын оппозициялык күчтөргө кошулушун жана аталган келишимдин жокко чыгарылышын талап кылууда.

Белгилей кетсек, 9-ноябрь күнү Армениянын премьер-министри Никол Пашинян, Азербайжандын президенти Ильхам Алиев жана Орусия президенти Владимир Путин тарабынан Тоолуу Карабах аймагындагы куралдуу тирешүүнү токтотуу боюнча келишимге кол коюлган.

Буга чейин Кыргыз өлкөсүндө да митингчилер тарабынан Ак Үй талкаланган. 5-октябрда парламенттик шайлоонун жыйынтыгына нааразы болгон партиялар баштаган митинг башталып, ал массалык башаламандыкка алып келген.

5-октябрдан 6-октябрга караган түнү митингчилер Ак Үйгө басып кирип,ага толук ээ болушкан. Натыйжада Жогорку Кеңештин жыйындар залы талкаланып, жетинчи кабаттагы бир топ иш бөлмөлөр өрттөлгөн.