"Сойкулук жасоо үчүн чек араны мыйзамсыз кесип өткөн". Ош шаарынын аймагында мыйзамсыз жүргөн жарандар кармалды

Ош шаардык ички иштер башкармалыгынын 10-бөлүмүнүн кызматкерлери Ош шаарындагы көп кабаттуу үйлөрдүн биринде жашап жатышкан өзбек жарандарын кармашты. Алар Ош шаарынын аймагында мыйзамсыз жүрүшкөн. Бул тууралуу Ош шаардык ички иштер башкармалыгынын басма сөз кызматынан кабарлашты.

Кармалган жарандар Фергана облусунун 1994-жылы туулган М.А. аттуу жана 1999-жылы туулган М.М. аттуу тургундары.

"1999-жылы туулган жарандын айтымына караганда, октябрь айында жашоо шартынын оордугуна байланыштуу Кыргыз өлкөсүнүн аймагына сойкулук жасоо үчүн мамлекеттик чек араны мыйзамсыз кесип өткөндүгүн жашырган жок. Ал экинчи кармалган М.А. менен бир батирде жашашкан. Өзбекстандын жарандары тарабынан Кыргыз Республикасынын мамлекеттик чек арасын мыйзамсыз түрдө бузуп өтүү фактысы боюнча топтолгон материалдар жана кармалган жарандар улуттук коопсуздук мамлекеттик комитетине иликтөөнү улантуу үчүн өткөрүлүп берилди", - дешти мекемеден.