Бүгүн, 27-сентябрь Камчыбек Ташиевдин туулган күнү

Бүгүн, 27-сентябрь Жогорку Кеңештин мурдагы депутаты Камчыбек Ташиевдин туулган күнү, ал 45 жашка толду. Дарегине канчалык жакшы-жаман пикирлер айтылбасын, жасаган иштеринен сырткары Ташиев өзгөчө эки жоругу менен элдин эсинде калары талашсыз. Биринчиси - 2010-жылдагы Ош, Жалал-Абаддагы Июнь окуясы учурунда октон коркпой, кан жутуп карайлап турган кыргыздардын арасында жүргөнү. Анын ал кездеги эрдиги азыркы күнгө чейин карапайым элдин арасында айтылып жүрөт. Экинчиси 2012-жылдын 3-октябрында Ак үйдүн тосмосун ашып түшөм деп айыпталып, жыйынтыгында депутаттык мандатынан айрылганы. Экс-депутат соттук отурумдардын аягына чейин күнөөсүз экенин айтып, “Кумтөр” маселесин көтөрүп чыгып бийликтин курмандыгына айланганын билдирип келди. Кимдин ким экенине мезгил баа бере турганы чындык.