Манасчы Дөөлөт Сыдыков 14 саатта 25 миң 200 сап Манас айтышы мүмкүн экендиги айтылды

Бүгүн, 12-ноябрда "Ала-Тоо" борбордук аянтында манасчы Дөөлөт Сыдыков Манас айтып жатат. Ал 14 саат бою токтобой, тынымсыз улуу баянды айтып, "Гиннесстин рекорддор" китебине кирүүгө аракет кылууда.

Анын канча сап Манас айтканы боюнча алдын ала божомолдор айтылууда. Манасчы Азиз Биймырза уулунун айтымында, 14 саатта 25 миң 200 сап айтылышы мүмкүн.

"Кудай буюрса, манасчы Дөөлөт Сыдыков Манас атабыздын баянынан 25 миң 200 сап айтканы турат, мындан да көп болушу мүмкүн.

Эстебес Турсуналиев, Замирбек Үсөнбаев 3 мүнөттө 90 сап ыр болот деген маегин окугам. Залкарлардын айтканы боюнча эсептегенде бир мүнөттө 30 сап, бир саатта 1800 сап, 14 саатта 25 миң 200 сап болот экен. 25 миң 200 сап 4 саатка эсептегенде 6 миң 300 куплет ыр болот.

Театрларда бир чоң спектакль 2 саат чамасында ойнолот. Ал дагы бир антракт менен, ал эми манасчыбыз 7 спектаклди болгондо дагы антрактсыз аткарып жатат. Драма, трагедия, комедия, лирика, мелодрама, мюзикл, саундрама, мистерия, пастораль, феерия, флиаки сыяктуу жанрлардын бир нече түрүн өз ичине камтып жатат", - деди манасчы Азиз Биймырза уулу.