Ошто ИИМдин биринчи орун басары Сүйүн Өмүрзаковдун иниси шектүү катары кармалды

Ош облустук прокуратурасынын улук прокурору Улукбек Өмүрзаков жана дагы үч жаран көмүр кенин рейдерлик жол менен басып алуу фактысы боюнча кармалды. Бул тууралуу УКМКнын басма сөз кызматынан билдиришти.

Маалыматка ылайык, президенттин милдетин аткаруучу, өкмөт башчы Садыр Жапаров Ош шаарындагы эл менен болгон жолугушууда жергиликтүү жашоочу аталган көмүр кениндеги рейдерлик ишти айтып берген. Бул боюнча УКМК кызматы иликтөө иштерин жүргүзүп баштаган.

"Улукбек Өмүрзаков менен бирге дагы 3 жаран кармалды. Алар көмүр кенин рейдерлик жол менен басып алууга катыштыгы бар деп шектелүүдө. "Мухамед Умар" спорт клубунун кызматкерлери баш болгон бир топ адам 2020-жылдын январь айында "Жолчырак" ЖЧКсынын көмүр кенинин аймагына кирип, ишкананын жумушчуларын карьердин сыртына чыгарып, атайын жабдыктарды тартып алышкан", - деп жазылат маалыматта.

Кармалган Улукбек Өмүрзаков - ички иштер министринин биринчи орун басары Сүйүн Өмүрзаковдун бир тууган иниси.