"Орто-Сай" базарында өрт катталгандан бери 4 күн өттү. Кырсыктын келип чыгуу себептери такталууда

9-ноябрга караган түнү Бишкектеги "Орто-Сай" базарында өрт чыккан. Кырсык катталгандан бери 4 күн өттү, азырынча өрттүн келип чыгуу себептери тактала элек. Бул тууралуу ӨКМнын маалымат кызматы тарабынан белгилүү болду.

Ал эми зыян тарткан соодагерлер арыз менен Октябрь РИИБине кайрылган. Алардын арызы сотко чейинки ачылган өндүрүшкө тиркелгенин Октябрь РИИБинин маалымат катчысы билдирди.

"Азыркы тапта өрттүн келип чыгуу себебин аныктоо үчүн соттук өрт-техникалык экспертиза дайындалып, анын жыйынтыгында шектүүлөргө тиешелүү юридикалык баа берилет", - деди маалымат кызматынан.

Базардан чыккан өрт саат 02:16да чектөөгө алынып, өрттүн андан ары башка объектилерге жайылышына жол берилген эмес. Өрт эртең менен саат 08:55те толугу менен өчүрүлгөн. ӨКМнын маалыматына ылайык, болжол менен өрттөн имараттын жалпы 1 миң 800 чарчы метр жер аянты күйгөн.

Бишкек ШИИББинен базардан чыккан өрт боюнча кылмыш иши ачылып, сотко чейинки териштирүү иштери жүргүзүлүп жатканын маалымдашкан.