Жумгалда 21 жаштагы жаран бычактан жаракат алып, ооруканага түштү. Шектүү кармалды

Нарын облусунун Жумгал районунда 21 жаштагы жаран бычактан жаракат алып, ооруканага жаткырылды. Бул тууралуу облустук милициядан билдиришти.

Малыматка ылайык, 13-ноябрь күнү болжол менен саат 22:45 чамасында Жумгал районунун үй-бүлөлүк медициналык борборунун фельдшери 102 кызматына телефон чалган. Анда ал Жумгал районунун Чаек айылынын 2001-жылы туулган Т.С аттуу тургуну бычактан жаракат алып ооруканага кайрылганын билдирген.

Аталган билдирүү боюнча ыкчам тергөө тобу аймактык ооруканага барып, жаран денесинен жаракат алгандыгын аныкташкан. Териштирүү ишинде Чаек айылынын 20 жаштагы тургуну Р.Т менен жабырлануучунун ортосунда пикир келишпестик орун алган. Шектүү жанында салып жүргөн бычак менен Т.С.ны бир жолу сол жак бел тушуна сайып жиберген. Бул факты Кылмыштардын жана жоруктардын бирдиктүү реестрине катталып, соттук-медициналык экспертиза дайындалган. Учурда окуяга тиешеси бар адамдар тергөө кызматына өткөрүлүп берилип, тергөө амалдары жүргүзүлүүдө.