"Мага ааламдан 2020-жылы сен президент болосуң деген аян келген" дейт Арстан Алай

Президенттикке талапкерлигин койгон Арстан Алай бул жылы президент болорун жарыялады. Бул тууралуу ал бүгүн, 17-ноябрда өткөн маалымат жыйында билдирди.

Арстан Алайдын айтымында, ал Сооронбай Жээнбековдун 2020-жылы кызматтан кетээрин алдын ала билген.

"Кудай тарабынан жаңы программа келди. Эгерде Жээнбеков ал программаны тааныганда өз элин сактап калмак. Баардык адамзатка жаңы жашоого болгон жолду көрсөтүп бермек. Мага ааламдан "2020-жылы Жээнбековдун мөөнөтү бүтөт, сен президент болосуң" деген аян келген. Албетте, Садыр Жапаров дагы президенттин милдетин аткарды. 40 күндөй өлкөнү башкарды. Аягында менин колумдан эч нерсе келбей атат, конституциялык реформа жасашыбыз керек экен деди. Эгерде ал жаңы программаны кабыл алганда 40 күндүн ичинде вирустун келип чыгыш себебин, кантип дарылануу керектигин дүйнө жүзүнө айтып бермек", - деди Арстан Алай.