Бишкектин "Тез жардам" кызматына 6 унаа тапшырылды

Бишкектин "Тез жардам" кызматына алты унаа тапшырылды. Бул тууралуу мэриянын басма сөз кызматынан билдиришти.

Маалыматка ылайык, шаардын социалдык саясат боюнча вице-мэри Айжан Чыныбаева шаардык "Тез жардам" кызматына "А" классындагы алты жаңы тез жардам унаасын тапшырды.

"Орусияда чыгарылган "Соболь" унаалары жалпы тез жардам бригадасына арналган. Алар бардык керектүү дарылоо-диагностикалык жабдуулар менен бейтапты кычкылтек менен камсыз кылуу, электрокардиографтар, небулайзерлер, дары-дармектерди сактоочу чемодандар менен жабдылган.

Учурда шаардык саламаттыкты сактоо башкармалыгынын автопаркынын балансында 54 автоунаа бар. Анын ичинен 13ү колдонуудан чыгарылууга тийиш, ошондой эле 8 атайын унаа медициналык тез жардам борборуна катталган. Баса, бир күндө орто эсеп менен 31-34 бригада ишке чыгышат. Атайын унаалар "Вираж" компаниясы тарабынан 13,7 миллион сомго жеткирилип, каражат шаардык бюджетте каралды.

Ушул жылдын июнь айында шаардык саламаттыкты сактоо башкармалыгы Бишкек шаарындагы медициналык тез жардам борборуна "А" классындагы алты тез жардам унаасын сатып алууга тендер жарыялаган", - деп жазылат маалыматта.