Мелис Тургунбаев "Кыргызнефтегаз" башкармалыгынын төрагасы болуп дайындалды

Мелис Тургунбаев "Кыргызнефтегаз" башкармалыгынын төрагасы болуп дайындалды. Бул тууралуу аталган мекеменин басма сөз кызматынан билдиришти.

Маалыматка ылайык, мындай чечим 20-ноябрь күнү компаниянын кезектеги жыйынында кабыл алынган.

"Мелис Тургунбаевдин жогорку жетекчилик кызматтарда 20 жылдык тажрыйбасы бар. Бүгүнкү күндө мунайгаз тармагындагы тажрыйбалуу жана таанылган адистердин бири. Ошондой эле "Мамлекеттик мүлктү башкаруу тутумунун отличниги" медалынын ээси", - деп жазылат маалыматта.

Белгилей кетсек, Мелис Тургунбаев 2013-жылдан 2017-жылга чейин аталган компаниянын директорлор кеңешинин мүчөсү болгон. Ал эми 2006-жылдан 2020-жылга чейин орус "Газпром" компаниясында иштеген. Ал газ тармагына келгенге чейин Каржы министрлигинин жетектөөчү адиси болуп да эмгектенген.