Бул ирет митинг эшек фермага каршы. Кара-Суудагы Мады айыл өкмөтүнүн тургундары митингге чыгышты

Ош облусуна караштуу Кара-Суу районундагы Мады айыл өкмөтүнүн тургундары бүгүн, 23-ноябрда эшек кармоо жайынын жабылышын талап кылып митингге чыгышты. Бул тууралуу социалдык тармактын колдонуучулары тарабынан видеолор тарады.

Митингге божолдуу 60ка чукул адам чогулган. Алар жайында өлгөн эшектерди таштандыга ыргытып жатканын, мындан улам оорулар көбөйүп жатканын айтышты. Эл эшек ферманы жабылсын деген талап менен чыгышкан. Мындан тышкары ал ферманын ичин айыл тургундарынан түзүлгөн комиссия текшерип чыкса деген талаптарды коюшкан.

Эл нааразычылык акциясына буга чейин дагы чыгып, талаптарын айтып келгенин, ал эми ферманын жетекчилиги тарабынан жабылат деген жооптор айтылганы менен эч кандай өзгөрүү болбогондугун айтышты.

Андан соң митингге чыккандар ферманын жетекчилигинин уруксаты менен ичине кирип таанышып чыгышты. Митингдин катышуучулары бир апта ичинде эшек фермасынын Кыргыз өлкөсүндөгү жетекчиси келип качан жабылат, кандай иш-чараларды көрөт толук маалымат берип өтүшүн талап кылышарын билдиришти.