Чек арадан аткезчилик жолу менен ташылып бара жаткан жүк кармалды

22-ноябрь күнү саат 22:20 чамасында Кадамжай районунун Марказ айыл өкмөтүнүн Достук жергилигинде “Солидарность 2019-2021” чек ара операциясынын алкагында жүргүзүлгөн иш-чаралардын негизинде аткезчилик жүк кармалды. Бул тууралуу өкмөттүн Баткен облусундагы ыйгарым укуктуу өкүлүнүн басма сөз кызматынан кабарлашты.

Маалыматка ылайык, чек ара кызматынын Баткен облустук башкармалыгы, облустук мамлекеттик улуттук коопсуздук комитетинин кызматкерлери менен биргеликте Кыргыз Республикасынан Өзбек Республикасына Кыргыз жараны тарабынан турмуш-тиричиликке керектелүүчү буюмдарды аткезчилик менен алып өтүү аракеттери жүрүп жаткан кезде кармашкан.

"Кармалган аткезчилик жүктүн болжолдуу баасы 200 миң сомду түзөт. Кармалган контрабанда жүккө карата тийиштүү иш кагаздар толтурулуп, Кыргыз Республикасынын мыйзамдарынын негизинде чара көрүү максатында Бажы кызматына өткөрүлүп берилди", - деди маалымат кызматынын өкүлү.