Унаа оодарылып кеткен. Өкмөттүн Ысык-Көл облусундагы өкүлү Элчибек Жантаев жол кырсыгына кабылып, ооруканада (фото)

Өкмөттүн Ысык-Көл облусундагы ыйгарым укуктуу өкүлү Элчибек Жантаев жол кырсыгына кабылды. Ал Балыкчы шаардык ооруканасына жеткирилгенин Ысык-Көл ОИИБинин маалымат катчысы билдирди.

Маалым болгондой, автокырсык бүгүн, 23-ноябрда Бишкек-Торугарт жолунун 156-чакырымында катталган.

"Балыкчы аймактык ооруканасынан ички иштер бөлүмүнө болжол менен саат 08:50 чамасында билдирүү келип түшкөн. Анда өкмөттүн өкүлү Элчибек Жантаев жол кырсыгына кабылып, ооруканага түшкөнү айтылды.

Ыкчам тергөө тобу алган маалыматка ылайык, Тойота Прадо үлгүсүндөгү кызматтык унаанын 24 жаштагы айдоочусу рулду башкара албай, оодарылып кеткен. Кырсыктын кесепетинен өкмөттүн өкүлү жеңил жаракат алды. Бул факт Балыкчы шаардык ички иштер бөлүмүнүн электрондук журналына катталды. Соттук-техникалык экспертиза дайындалды", - деп билдирди маалымат катчы.