УКМКнын төрагасы Камчыбек Ташиев Савай айылынын башчысын кабыл алды

Улуттук коопсуздук боюнча мамлекеттик комитетинин төрагасы Камчыбек Ташиев Савай айылынын башчысы Мунарбек Сайпидиновду кабыл алды. Бул тууралуу УКМКнын басма сөз кызматынан билдиришти.

"Төрага УКМКнын кызматкерлерине доомат коюп видеокайрылуу тараткан Сайпидиновду кабыл алып, жүйөсүн укту. Жыйынтыгында Камчыбек Ташиев тиешелүү тараптарга видеокайрылууда айтылган айыптоолор боюнча ар тараптуу жана тыкыр иликтөөнү тапшырды" , - деп жазылат маалыматта.

Ошондой эле Ташиев УКМК саясаттан тыш экенин билдирип, эч качан саясий мотивдер менен иш алып барбасын айтканы маалымдалат.

Эске салсак, 2020-жылдын 18-ноябрында УКМК Кара-Суу районунун Савай айылынын башчысы Мунарбек Сайпидинов менен Сарай айыл өкмөтүнүн башчысы Замирбек Тургунбаевдин үйүн тинтүүгө алган. УКМКнын маалыматына ылайык, өкмөт башчыларынын үйүндө тинтүү соттун санкциясынын негизинде жүргүзүлгөн.

Окуядан соң Мунарбек Сайпидинов туугандарына жана Турганбаевдин апасына орой мамиле жасалды деп УКМКнын кызматкерлерин айыптап, видеокайрылуу жасаган.