Айзаттын тилеги ишке ашмай болду. Ал макияж жасоо боюнча курстан өтөт

Ден соолугунун мүмкүнчүлүгү чектелген Айзат Мамырай кызы буга чейин SUPER.KG порталына маек берген. "Бир колумдун жоктугун сезбей көп жумуш бүтүрөм" деген ал бир колунан кантип ажырап калганынан баштап, азыркы жашоосу тууралуу айтып берген.

Ал маектен кийин жашоосунда көп өзгөрүүлөр болгонун айтат. Айтымында, анын ден соолугун сурап, бакыт каалагандардын саны арбыган, бирок ошол эле учурда терс пикир жазгандар да жок эмес.

“Мен сиздерге интервью берип чыккандан кийин өтө көп адамдар мага жазып, чалып жатышат. Алардын бир тарабы жакшы тилектерин айтып, бактылуу болушумду каалап, азамат дешсе, экинчи тарап терс пикир жазып, жүрөгүмдү оорутуп жатат. Айрыкча колуң бар туруп эмнеге долулук кыласың деген сөздөрү сөөктөн өттү.

Анан Айпери Суранчиева макияж жасоого кызыксаң окутабыз деп өзүнө чакырды. Мен эми ал жакта 3-декабрдан баштап окуй баштайм. Бир ай окуйт экенмин, андан кийин ал жак мени жумуш менен камсыз кыла турган болду”, - дейт Айзат.