"Алдыда кычыраган кыш". Оштогу памирликтер кандай күн кечирип жатканын баяндайбыз (фото)

Памирден келген кыргыздар Ош облусунун Алай районундагы Сары-Могол айылынан Талды-Суу айылына 24-октябрда көчүп келишкен. Азыркы учурда айылда 18 үй-бүлө, 88 адам жашап жатат. Бул тууралуу Талды-Суу айыл өкмөтүнүн катчысы Ырыскан Орколова билдирди.

Учурда Талды-Суу айылында жашап жаткан Памирден келген боордошторубуз кат-сабатын ачуу максатында мектепке барып, окуп жаткандыгын айтышты.

"24-октябрда көчүп келгенбиз. Азыр суук, жумуш жок. Жаңы көчүп келгенде айыл өкмөтү тарабынан (1 мүшөк ун, 4 литр май жана башка) азык-түлүк берилген. Мындан кийин дагы азык-түлүк берилеби, жокпу айта албайм. Үйлөр "паровой" менен жабдылган, ошондуктан ичи жылуу. Болжолдуу 15ке жакын окуучу 1-класстан 5-класска чейинки мектепке барып жатышат.

Бул жактагы суук менен Памирдин суугу бирдей эле болуп калат экен. Ал жакта деле ушундай суук, жаан-чачын. Бирок азырынча жашоочулардын Памирге көчүп кетүү ойлору жок", - деди Памирден келген Нурулхуда Турдиахун уулу.

"Азырынча жакшы жашап жатабыз. Бизди Сары-Могол айылынан Талды-Сууга көчүрүп келишти. Сары-Могол айылында базар болот эле, андан тышкары жума намаз жакшыраак болчу. Ал эми аба ырайы боюнча айтсам, эки айыл бирдей эле суук экен. Үйлөрдү көмүр менен жылытып жатабыз. Бир унаа көмүр түшүрүп беришкен. Аны бөлүп алганбыз. Азырынча жетиштүү.

Кайра Памирге көчүп кетүү оюбуз деле жок. Балдарыбыз окуса, жакшы жашасак. Памир суук болгондуктан ден соолукка көп зыян алып келчү. Памирден жылуу жерде болсок дегенбиз. Жаңы көчүп келгенде азык-түлүк берилген, ошону менен жашап жатабыз. Мындан кийин азык-түлүктү өзүбүз алабызбы же мамлекет береби муну дагы билбейбиз.

Мектепке барып окуп жатам. Эртең менен саат 9:00дө барып, 12ге чейин окуп жатабыз. Кээ бирлери экинчи нөөмөттө 5ке чейин окушат. Үйдө жалпы 13 адам жашайбыз", - деди памирлик Оганбек Зайир уулу.

Эске салсак, 2019-жылы Ооган аймагынан 11 үй-бүлө көчүрүлүп келген. Андан соң Алай районунун Сары-Могол айыл аймагындагы мектептин имаратына жайгаштырылган. Кийинчерээк Талды-Суу айылына 24-октябрда көчүрүлүп, атайын Памирден келгендер үчүн курулган үйлөргө жайгаштырылган.