Актёр, активист Эркин Нурбаев Садыр Жапаровду дебатка чакырам дейт

Актёр, алып баруучу, "Реформа" партиясынын катарында Жогорку Кеңештин депутаттыгына талапкер болгон Эркин Нурбаев Садыр Жапаровду дебатка чакырат. Бул тууралуу ал SUPER.KG порталына билдирди.

Айтымында, ал Садыр Жапаровдун 7-каналга берген интервьюсунда айткан "Түшүнүгү жок жаш балдар гана жаңы Конституцияга каршы чыгып жатат" деген сөзүн "негизсиз" деп эсептейт жана анын жаштарга акцент койгону туура эмес.

"Бул тууралуу Айбек Теңизбаев дагы социалдык тармактагы баракчасына жазып чыкты. Мен анын оюна толук кошулам жана анын пикирин кубаттайм. Акыркы саясий окуяларды эске алып, мен парламенттик башкаруу формасынын жактоочусу катары Конституциянын жаңы редакциясына каршы чыктым. Садыр Нуркожоевич жаңы Конституцияга каршы чыккандар эч нерсени түшүнбөгөн жаштар экендигин айтты. Ошондуктан мен анын дебатта айткандарын түшүндүрүп берүүсүн талап кылам", - деди Нурбаев.