Велосипедчен адамды өлтүрө сүзүп алган Талас облусунун башчысынын экс-жардамчысына сот чечим чыгарды

Мас абалда велосипедчен баланы өлтүрө сүзүп алган Талас облусунун ыйгарым укуктуу өкүлүнүн экс-жардамчысы Марслатбек Шералиевге сот чечим чыгарды. Бул тууралуу Жогорку Соттон билдиришти.

Маалыматка ылайык, өкүмдү Талас райондук соту 23-ноябрда чыгарган. Анда Марслатбек Шералиев күнөлүү деп табылып, 3 жылга эркинен ажыратылган. Ошондой эле эки жылдык мөөнөткө айдоочулук укугунан ажыратылган.

Окуянын чоо-жайы:

Ушул жылдын 30-июль күнү, саат 17:30 чамасында Көк-Токой айылында Toyota runner унаасын 53 жаштагы Марслатбек Шералиев башкарып бараткан. Ал батыштан чыгышка карай бара жатып, жол жээгинде велосипед менен бараткан адамды сүзгөн. Андан кийин жол четинде токтоп турган Мерседес-Бенц Гигант унаасын сүзүп токтогон. Ал эми велосипедчен жабырлануучу 23 жаштагы А.А. аттуу жаран болгон. Ал Манас райондук ооруканасына жеткирилип, көп өтпөй каза болуп калган. Айдоочуну экспертизадан өткөрүшкөндө ал мас абалда болгону аныкталган. Манас РИИБи бул фактыны Кылмыштардын жана жоруктардын бирдиктүү реестрине каттап, сотко чейинки өндүрүшкө алган. Унаа айып короосуна токтотулган.