Эдил Байсалов: "Президенттик башкарууга кайтуу керек экендигин 2014-жылдан бери айтып келем"

Кыргыз мамлекети президенттик башкаруу формасына кайтуусу керек. Мындай пикирин SUPER.KG порталына Кыргыз Республикасынын Улуу Британиядагы элчиси, конституциялык кеңешменин мүчөсү Эдил Байсалов билдирди.

Анын айтымында, парламенттик башкаруу системи 10 жыл ичинде өзүн терс жагынан көрсөттү.

"Мен Конституциялык реформаны колдойм. Өлкөбүз президенттик башкарууга кайтып келиши керек. Анткени парламенттик өлкө болгондон бери бизде эч кандай өсүш болгон жок. Тескерисинче, бир топ артка кеттик. Эл өкүлдөрү өздөрү иштебегени аз келгенсип, иштеп жаткан министрлерди жүдөтүштү. Беш фракция, мамлекетти беш тарапка сүйрөп, алдыга жылууга тоскоолдук жаратып туруп алышты. Мындай башкаруу бизге жарабайт.

Азыркы эң башкы көйгөй - жакырчылык маселеси. Жакыр мамлекетке парламентаризм жарашпайт. Менин пикиримди уккандар "сен Садыр Жапаровго жагынып, анын арыгын чаап жатасың" деп жатышат. Бирок мен 2014-жылдан бери президенттик башкаруу керек экендигин айтып келем. Менин социалдык тармактардагы баракчаларымды, ар кандай басылмаларга берген, буга чейинки маектеримди карап көрсөңуздөр айткандарыма ынанасыздар", - деди Байсалов.