Улуттук банк 1-декабрдан баштап "Кыргыз күрөш" коллекциялык тыйындарын жүгүртүүгө чыгарат

Улуттук банк 1-декабрдан тартып "Кыргыз күрөш" коллекциялык күмүш жана жез-никель тыйындарын жүгүртүүгө чыгарат. Бул тууралуу Улуттук банктын басма сөз кызматынан кабарлашты.

Маалыматка ылайык, "Дүйнөлүк көчмөндөр оюндары" сериясынын "Кыргыз күрөш" коллекциялык тыйындары улуттук спорттун түрүн жандандыруу жана даңазалоо максатында чыгарылган жана IV Дүйнөлүк көчмөндөр оюндарына арналды.

"Көрүүчүлөрдүн, боз үйлөр менен тоолордун фонунда күрөшүп жаткан балбандар тыйындын алдыңкы бетинин негизги сюжетин түзөт. Тыйындын жогору жагында Дүйнөлүк көчмөндөр оюндарынын логотиби жана "Кыргыз күрөш / Kyrgyz kurosh" жазуусу түшүрүлгөн. Ал эми оң жагында номиналы (10 сом) көрсөтүлгөн. Тыйындын төмөн жагында улуттук оюулар түшүрүлүп, металлдын сапат белгиси (Ag 925°) жана салмагы (31,10 g) берилген", - деп жазылат маалыматта.