Балбак Түлөбаев: "Конуштарда жашоочулар көмүр эмес, таштанды жагып Бишкекти түтүн каптап жатат"

Жаңы конуштарда кээ бир жашоочулар көмүрдү мурун даярдап албай, таштандыларды жагып, андан чыккан түтүн Бишкекти каптап жатат. Мындай пикирди бүгүн,1-декабрда Бишкек шаарынын мэринин милдетин аткаруучу Балбак Түлөбаев түз эфир учурунда "Бишкек жылуулук мезгилине даярбы?" деген суроого жооп берип жатып билдирди.

"Бишкек шаарында 3 түрдүү жылуулук системи бар. Биринчиси, бул борборлоштурулган ЖЭБ аркылуу келет. Ал "Улуттук энергетикалык холдинг" жана өкмөт тарабынан каржыланган жана өкмөт тарабынан каралган систем. Экинчиси, "Бишкек жылуулук энерго" ишканасы, ал муниципалитеттин өзүнүн системи. Үчүнчүсү, жарандар газ, жарык, отун, көмүр аркылуу үйлөрүн өздөрү жылытат. Бишкекти жылытуу боюнча "Улуттук энергетикалык холдинг" боюнча өкмөт тарабынан алганда Бишкек ЖЭБи даяр. Биздин "Бишкек жылуулук энерго" ишканасы да даяр. Кээ бир жерлердеги авариялык абалдарды эске албаганда кыштан чыгууга толугу менен даяр деп айта алабыз. Бул комплекстүү түрдөгү иш-чара", - дейт Балбак Түлөбаев.