Оштун "Алай" футболдук клубу Орто Азиядагы эң популярдуу клубдардын ичинен экинчи орунду ээледи

Оштун "Алай" футболдук клубу АФК жүргүзгөн сурамжылоодо Орто Азиядагы эң популярдуу клубдардын ичинен экинчи орунду ээледи.

Добуш берүү 28-ноябрдан 1-декабрга чейин жүргүзүлүп, ага Өзбекстан, Кыргыз өлкөсү, Тажикстан жана Түркмөнстандан жалпы 10 команда катышты.

Сурамжылоого Кыргыз өлкөсүнүн атынан бишкектик "Дордой" менен Оштун "Алай" клубдары катышты. "Дордой" клубу 7 пайыз добушу менен 5-орунга жайгашса, "Алай" клубу 20 пайыз добушу менен 2-орунга жайгашты.

Бул тууралуу "Алай" клубунун басма сөз кызматкери Нуристан Марат уулуна байланышканыбызда добуш берген ар бир күйөрманга ыраазычылыгын билдирип, буларга токтолду:

"Бул сурамжылоо АФК тарабынан Орто Азиядагы эң популярдуу клубдар арасында жүргүзүлдү. Албетте, мындай көрсөткүч бизге чоң мотивация берет. Добуш берген ар бир күйөрманга чын жүрөктөн ыраазычылыгыбызды билдиребиз", - деди ал.