Башкы прокуратуранын өрттөнүп кеткен имаратынын ордуна Бишкек шаардык кеңеши үчүн имарат курулат. Анын себебин Балбак Түлөбаев түшүндүрдү

Бүгүн, 1-декабрда Бишкек шаарынын милдетин аткаруучу Балбак Түлөбаев түз эфирде шаардыктардын суроолоруна жооп берди.

Анда Түлөбаевге "Башкы прокуратуранын өрттөнүп кеткен имаратынын ордуна Бишкек шаардык кеңеши үчүн имарат курулат деген чечимди сынга алып жатат" деген суроо узатылды.

"Мурунку Башкы прокуратуранын имаратынын орду ошол калыбында 10 жылдан бери турат. Буга чейин кээ бирлери ал жердин ордуна мейманкана же офистерди курууну пландап келишкен экен. Эмнеге бүгүнкү күнгө чейин ишке ашырган жок? Анан дагы силер мэрияга кирип көргүлөчү. Бир бөлмөдө 8 адамга чейин отуруп иштейт. Ушундай шартта иштөөгө мүмкүнбү? Шаардык кеңештин аппаратынын иштеген жерин көргүлө. Мындан тышкары мэриянын алдындагы кызматтар шаар боюнча ар кайсы жерлерде бөлүнүп иштешет. Мэрияда подвалда отуруп иштегендер бар. Ал эми Башкы прокуратуранын мурунку имаратынын ордуна кайра жаңы имарат тургузулса, ал экиге бөлүнөт. Бир жагына Бишкек шаардык кеңештин аппараты отурат. Бир жагында биздин муниципалдык кызматтагылар отурат. Сиздер дагы бизди туура түшүнгүлө. Биздин кызматкерлер дагы нормалдуу шартта иштеп, шаарга кызмат кылышы керек", - дейт Балбак Түлөбаев.